Tigsik

Tigsik ko an mga tawong igwa nin mga atraso

May kasalan sa kahimanwa asin sa gobyerno

Dawa asin dumulag na makalikay sa mga kaso

Madadakop, masisikop nanggad nang sigurado

Tigsik ko an mga nagkukurahaw nin tubig baga

Haloy nang panahon, mga gripo daing bulos na

Pag-abot ni Enting an darang tubig sobra-sobra

Bako sana basta tubig, salog, an dinara sa inda

Tigsik ko an mga nadadalan ta sa tv, sa celfon

Puro sarambayan, piridayan nin mag-aragom

Garo baga ordinaryo na an siring na sitwasyon

Na dai nang pakiaram sa sa indang reputasyon

Tigsik ko an ibang lalaking talagang makauyit

Dawa may alsom pa ngani man, agom na legit

Dai pa nakokontento, naghahanap pa nin kabit

Nagdedeliryo na, nasa legit, si kabit pa an iniisip

Tigsik ko man ining mga sambay o an mga kabit

Mga daing supog, agresibong orog kaysa sa legit

Logod magkaigwang takot sa Diyos na nasa langit

Ta tibaad an mapadumanan nindo lugar na mainit