Tigsik

Tigsik ko an mga pulitikong bakong epal daa

Ta dai nakikisakay kan sa gobyernong ayuda

Dai nagpaparetrato asin ta dai man naglilista

Nasusupog mag-ako kan bako na hale sa inda

Tigsik ko ining mauswag na Syudad nin Naga

Logod ipagpadagos, paglinig sa mga bangketa

Mga kakanan, iba pang negosyo nakabagat pa

Sa lakawan kan mga tawo nakakaulang talaga

Tigsik ko ining sa mga tinampo ta nakalaylay

Mga kable na sa motorista delikadong tunay

Ta kun an mga ini dai nahihiling minasablay

Kaya an kadaklan binabawian man nin buhay

Tigsik ko an presenting kalakawan kan pulitika

Kan nasa pwesto pa haros sambahon na sinda

Alagad kan makahali na haros pa sana isuka na

Nin huli ta dai marhay mga nagin serbisyo ninda

Tigsik ko ining sarong autoridad na nagpahayag

An pinakadahulang grupo nin kriminal nanggad

Nasa PNP, na iyo an maprotekta sa tuya dapat

Ta pirmi sindang embwelto sa mga kriminalidad