Tigsik

Tigsik ko ini bagang nakaagi pa sanang delubyo

Logod mapagimata na an kadaklan sa mga tawo

Na pondohon na an kararatan, mga salang gibo

Ta piglalatob na o tinatawan na kita nin kastigo

Tigsik ko an mabubuot nyatong mga kahimanwa

Kun igwa nin kalamidad nagtatarabangan sinda

Tangani na mga nasa peligro pa saphudon ninda

Na maipamati man, pagdamay sa indang kapwa

Tigsik ko man ining mga serbidor nin gobyerno

Na kun nagkakaigwa nin kalamidad, remalaso

Yaon man sinda sa tunay na pagserbi sa publiko

Dai man minapabaya sa sinumpaan na trabaho

Tigsik ko ining saro sa mga pamusong kasabihan

Dai nin mayaman na dai na nin pangangaipuhan

Asin dai nin nagtitios na dai lamang maitatabang

Nangyayari ini sa panahon nin mga katikapuhan

Tigsik ko inig mga negosyanting sa kapwa pagabat

Orog na kun nagkakaigwa nin krisis o kalamidad

Sa panahon nin pangangaipo igwang opurtunidad

Makaganansiya sa mga tinda sa paliog na kantidad