Tigsik

Tigsik ko ini bagang sunud-sunod nang bagyo

An mga pagbaha, pagrasay ni daga labo-labo

Bako sana sa lugar ta, inabot kaining delubyo

Resulta sa buhay, kapalibutan ta puro distroso

Tigsik ko man an mga negosyanting pagabat

Sa mga biktima nin delubyo o kan kalamidad

Imbes maherak sa sitwasyon na makaheherak

Mga barakalon paliog man talaga an kantidad

Tigsik ko an mga makaheherak na negosyante

Na kadaklan kan mga paninda ninda napyerde

Nasa gilid nin tinampo namamaron na pwerte

Presyo nin barakalon malangkaw nin labi-labi

Tigsik ko ining dati Nagayon, Naga Smiles pa

Alagad ngunyan inaapod na Naga Smells daa

Imbes kuta na maparaturuyaw mag-irisip na

Kun paano, ano an maiambag sa gobyerno ta

Tigsik ko an magurang kun tulos nagagadan

An makaheherak an mga aki na nababayaan

Orog kun sa trabaho sa harong dai nin aram

Kaya amay pa dapat na sindang matukduan