Tigsik

Tigsik ko ining Nagayon na Naga Smells na

Ta nahapay na, mga parahakot nin basura

Kaya semana nang nakaagi ining si Kristina

Mga basura sa sentro pahingurag pa talaga

Tigsik ko man, mga nasa lokal na gobyerno

Magtagama nin pondo para sa pag “rescue”

Ta kun may kalamidad may gagamiton kamo

Na makasalbar nin buhay sa oras nin peligro

Tigsi ko man an mga nasa dyario, nasa radyo

Na dai nagbabareta nin bako man na tutuo

Pig-aaram kun lihitimo bago magkomentaryo

Na dai makaraot orog sa mga nasa gobyerno

Tigsik ko kun igwa baga nin mga kalamidad

Mga ''calamity fund ” nailuluwas mananggad

Sa mga nangangaipo an ayuda maitao dapat

Bakong an mga kurapto iyo an magpakabadat

Tigsik ko an mga tawong dai nakakagamiaw

Sa mga sala ta, an Diyos na nagbabalinghaw

Sa paagi nin kalamidad kita Niya pinupukaw

Ta dakol na kaya, an sa Iya na nakakalingaw