Tigsik

Tigsik ko an pagsabat kaining Bagong Taon,

Nagpasirikatan an manlaen-laen na nasyon.

Nin magagarbong ''fireworks” na magagayon,

Kaya kadakol paradalan an mga maogmahon.

Tigsik ko man an igwang matatagas na hutok,

Na dai napugulan nanggad magparapaputok.

Kaya dakol nabugahan na mga mata, kamot,

Sa ngunyan nagsasapo talaga nin makukulog.

Tigsik mo man ning mga suanoy na pagtubod,

Na dapat sabaton an Bagong Taon na marebok.

Tangani an mga ispiritu sa harong na mararaot,

Asin sa kapalibutan ta magdurulag nanggayod.

Tigsik ko kun igwa nin selebrasyon mananggad,

Kun nanganganaan kakan biyong nabubundat.

May minakulog an tulak, an iba nahahayblad,

Kaya man kadaklan sa ospital na minabagsak.

Tigsik ko man an mga kahimanwa na mabubuot,

Imbes na magpaputok nagparapatanog turutot.

An iba an kaldero, kaserola an pigparapurukpok,

Kaibahan na dyan an putok kan sa indang yukyok.