Tigsik

Tigsik ko an iba sa paratraysikel sa ngunyan,

Na may tarpaulin nin kandidato sa lulunadan.

Pagkua kan bayad sa bulan-bulan nasasakitan,

Sa pagparapila, pagkayod ninda naaapektuhan.

Tigsik ko man an mga botante na oportunista,

Na sa mga kandidato sige an kua nin kwarta,

Kun baga sa kasabihan an kwarta ibulsa sana,

An kandidatong gusto iyo an isururat sa balota.

Tigsik ko an mga tawong poderoso nanggad na,

Na kun an gusto, sa legal na paagi dai makukua.

An panggagadan iyo an pirming panakot ninda,

Ta daing pakimano kun mangaradan nin kapwa.

Tigsik ko ngunyan an iba sa satong kahimanwa,

Na dai nang haros sa pagkua nin buhay kan iba.

Ta inaaniban na nin demonyo an hawak ninda,

Kaya an ngisi ni satanas abot pirmi sa talinga.

Tigsik ko kun an mga tawong may pamilya na,

Kun dai tultol an pagplano, marerebok talaga.

Kun bako si Kristo an sentro kan buhay ninda,

Siguradong an rebok, iriwal pirmi yaon sa inda.