Tigsik

Tigsik ko an mga botante ngunyan na makaurag,

Na dai minaboto kun dai tawan nin pirak, hagrak.

An mga pulitiko logod nakakaisip nang magkurap,

Pondo para sa mga proyekto nahahabas nanggad.

Tigsik ko an panahon ngunyan na suwi na baga,

An mga botante iyo an mga kurapto na talaga.

Sinda an dahilan na mga pulitiko manghabas na,

Ta wala tuo an hagad sa mga pulitiko nin kwarta.

Tigsik ko an sarong banwaan na may peryahn,

Na sa ngunyan daa ginigiribo nang pasugalan.

Mga babaying agom namomroblema na man,

Ta an para sa pamilya nauubos na sana diyan.

Tigsik ko an ibang nagpapatugdok nin edipisyo,

Na dai man honesto sa pagpapirma nin permiso.

Tolong eskalon sana an sa permit trese ipinagibo,

Siisay an makahirak kun magkaigwa nin remalaso.

Tigsik ko pa an mga lalaki na grabe an alimpasay ,

Na kan hoben pa nagparapasiram sa mga sambay.

Kan naghelang na, na dai nang paglaom marahay,

An nagsakripisyo an tunay na agom man giraray.