Tigsik

Tigsik ko ining sarong dating presidente,

Na sa “war on drugs” nagpakalabi-labi.

Kadakol kan ginaradan na mga inosente,

Kaya rinamalan, binitbit na kaining ICC.

Tigsik ko ining mga pulis na naembwelto,

Pag-utob kan “war on dugs” nag-arabuso.

Dapat kaibahan sinda kan saindang amo,

Orog na mga ogag na senador na kaalyado.

Tigsik ko man ining sarong senador baga,

Na sa giyera kontra droga nagsuporta daa.

Kaya sa amo niya dapat na siya man kaiba,

Ta sa languban tuod na man daa ngani siya .

Tigsik ko, sistema kan hustisya sa nasyon ta,

Na kun an mga akusado poderoso, makwarta.

Dawa maysala ta bihira an nalalangob sa inda.

Kun tios dawa daing sala yaon tulos an padusa.

Tigsik ko pa ini bagang suanoy na kasabihan,

Kun igwa nin kasalan igwa nin kapadusahan.

Logod na magin leksyon man ini sa kagabsan,

Na makalikay sinda paggibo nin mga kasalan.