Tigsik

Tigsik ko ining mauswag na Syudad nin Naga,

Nag- uuswag man pagpiot kan mga bangketa.

Haros tumahaw na sa tinampo mga paratinda,

Kaya an mga tawo napapastidyo na man talaga.

Tigsik ko man an mga buta nang pulis trapiko,

Dai nahihiling, mga tsuper na dai disiplinado.

Sa balyuhan nin tawo, naparada kan behikulo,

Kaya an mga parabalyo pirmi nang konsumido.

Tigsik ko man ining sarong epal na senadora,

An tugang na nakapwesto pigkakalaban niya.

Si kriminal na amigo iyo an pigpapaburan pa,

Inda sana kun an mga Pinoy bomoto pa sa iya.

Tigsik ko an iba sa mga kandidato ngunyan,

Na dai sana nanlalamuda kan mga kalaban.

Sa indang plataporma iyo sanang inaatuman,

Dai sana labot kan ibang may mga katuyuhan.

Tigsik ko man an mga botanting matalento,

Na dai naaara sa mga panao nin kandidato,

Ginagamit an hutok sa pagtao nin mandato,

Ta aram na ninda an magigin resulta kainiho.