Tsokolate Sa Quality

Grabe an benino kan Tsokolate sa Quality Bakery, ta ini iyo nanggad an pinag dadayo sa lugar lalo na kan mga Senior Citizens asin mga balikbayan. Magpoon pa kan haloy nang panahon, nasunuan na kan mga Naguenio an mainiton na tsokolate na hale sa tableya na mismong sinda ang nag gibo . Masulong sa Quality an tsokolate asin an pig toast na pan legazpi na pig hapulas nin butter o bagaman pig paipitan nin keso. Sarong hapon, naisip kong maghapit sa Quality tanganing mag kape asin maki istorya ki Ching na iyo an kahera asin duman ko nataymingan sige an sapa nin inasal na tinapay asin naghihigop nin nagkakara kalayong tsokolate si Pempe Bagadion na saro ko palan na paradangog sa radyo. Sa samuyang pag ulay ulay, saiyang sinabi na kaya daa avid listener ko siya ta saro ako sa perang mga announcer sa radyo na iguang tunay na tembre nin boses na pang radyo, bakong arog daa kan iba basta na sana naging announcer sa radyo matapos sugoon kan ina na magbakal nin suka. Kan sakuyang henerasyon sa radyo, inabot ko an istriktong proceso sa pag hire nin announcer arog kan pagpasar sa audition asin interview. Kan ako maglaog sa DZHN kan 1981, pig audition ako ni Program Manager Irene Florenda Abragan asin nakumbinser man siya sa sakuyang boses kaya nakalaog ako sa DZHN bilang sarong reporter. Pero mas istrikto kaidtong inaapod na Golden Years in Radio kan panahon ninda Eddie Alanis asin Fiorel Salvo ta an pag audition ginagamit an English. Sa pag pa sanglean mi nin istorya ni Pempe Bagadion, saka ko lang naaraman na nagi siyang winner sa “ Mr. Philippines” sarong kompetisyon nin mga guapo, asin maskuladong lalaki na matibay na body building asin pag alsa nin magabat na bagay arog kan barbel, gapo asin mga harigi. Ang karahayan ki Pempe ta sa sunod sunod ming paghilingan sa Quality, dai nanggad nagtutugot na magbayad ako ta an gabos kong kinakan siya an nagbabayad. Siguro arog man kan ibang bikolano, kaipuhan ni Pempe an mga lugar arog kan Quality, SM, New China, asin iba pang kapihan tanganing makakua nin kaistorya asin mahale an kapungawan sa buhay ta an saiyang mga aki asin agom nag iistar sa abroad. Hale naman siya sa halawig na pag trabaho sa London asin Australia asin mas pinili niya an magtener sa Naga ta iyo an maogmang lugar. An mga Bagadon tubong libmanan asin sadiring tawo kan mga Aureus, Ursua asin Durante. Dakul sindang mag turugang na anas nag escuela sa Naga asin nagsakripisyo sa pag biyahe nin lantsa sa rotang libmanan asin Naga. NInhuli sa siring na sitwasyon naisipan kan saindang magurang na maglipat nin istaran sa Naga City Subdivision. Sa pag kape sa Quaity, igua nin nakaka istoryahan asin igua nin nakukuang mga istorya. Saro sa istorya ni Pempe iyo an dai malingawan na pinaka premirong Search for Mr.Philippines na ginibo sa Naga asin iyo daa idto an pinaka bantog na “ nagka orola” o makasusupog na programa. Sa pagmanehar nin sarong bantog na maskuladong lalaki sa Naga, na kinua an ideya asin tabang ni Pempe sa pag organize kan Mr Philippines tanganing may magayon na dalanon sa Plaza Quezon. Sa kaisipan na masolo an delihinsiya, pig itsa puera si Pempe na iyo kutana an may pugol kan mga mayayaman na kompanya na ma sponsor kan Mr Philippines. Kan maaraman na tinanggal kan grupo si Pempe nag alsa balutan an mga sponsor asin mayong natada. An nangyari, nagka orola an pageant na dati saro ini sa importangteng dalanon sa Araneta coliseum asin sa ibang ciudad. An mga opisyal kan Mr. Philippine kadaklan mga negosyante asin milyonaryo na dapat naka check in sa 5 star hotel asin makakan sa mga sikat na restaurant. Sa kawaran nin budget an mga opisyal pinalunad sa Bus asin bakong eroplano, kaiba an mga contestants na pina dagos sana sa mga ordinaryon hotel sa centro asin sa may tabuco. PInakarakan sa Tres Otsos asin sa sunod na aldao, pig iribahan na mag isnak sa open patio kan supermarket para magtudok nin rabot asin paksiw, sagkod na an producer na maskulado nagka utang nin maabot sa sanggatos mil de pesos . Iyo daa idto an pinaka worst na Mr. Philippines sa Nasyon. Sa ngonian, si Pempe dara kan pagiging Senior Citizen dai na nag aalsa nin mga barbel imbes naoogma na sanang mag sopsop nin tsokolate sa Quality.