Undas 2024 sa Bicol matuninong - PNP

Nagtutubod an Camp BGen Simeon Ola na an amay na pag-andam sa seguridad sa Undas kan PNP ngunian na taon nakatabang nganing matuninong si paz y orden.

Si P/BGen Andre Dizon, regional director kan PNP Bicol nagpahayag na heneralmente naging matuninong si Undas 2024 sa rehiyon matapos amay nindang pigwarak si cuatro mil na kapupulisan sa mga kampo santo kabale na sa mga terminal, mall, sentro komersiyal kan ciudad maging banwaan asin sa iba pang mga matawong lugar.

Laen pa kaini, siya nag-inspeksyon sa mga terminal kabale na an Bicol Central Station sa Ciudad nin Naga asin sa iba pang lugar nganing pagirumdumon an mga tsuper na seguradohon na maging safety an saindang viaje sa paghatod nin pasajeros. Nagbisita pa kan saiyang mga personajes sa mga kampo santo.

Nag-inspeksyon pa sa mga memorial parks sa mga banwaan kan Baao, Ciudad nin Naga, gabos sa Camarines Sur siring man sa Polangui, Albay asin Ciudad nin Legazpi.

An unidad orog na si cooperasyon kan kumunidad sa mga awtoridad dakulang bagay nganing maseguro si paz y orden.

Gabos na Provincial Office kan PNP sa rehiyon Bicol nasa red alert mantang nagdestino nin kapupulisan sa mga kamposanto, sabi pa kan PNP regional director.

Mantang sa Legazpi PNP nagbubugtak nin mga name tag sa mga nag-eedad na diez anyos na aki pababa na naglalaog sa kampo santo nganing madaling mahanap kun nawawara.