Villafuerte Vs. Leni Sa Naga

Igua na nin kalaban si Madam sa pagka Alakalde sa Naga City sa 2025, ini sarong Villafuerte na dai man direktamenteng may koneksyon ki Gov. Luigi asin Cong. Lray Villafuerte. An pinag hahagad kan banwaan na magdalagan nin Mayor sa Ciudad nin Naga iyo si Mr. Ben Villafuerte tubong Barangay Sabang asin iyo an may sadiri kan mga solar sa may palibot kan LCC. Sa pakipag ulay kan Calle Maduros ki Ben Villafuerte, sinabi kaini na iguang mga sektor sa Naga an nageenkamenar saiya na mag kandidato sa 2025. An rason iyo na, imuklat sa mga taga Naga an pangangaipo na ribayan an mga nagtuturukaw na opisyal sa City Hall ninhuli ta dai ninda nareresolberan an mga problema sa Naga. An mga mayor na problema sa Naga iyo an pagtios kan mayoria kan constituents, an padagos na nagroro’ro na goromok nin trafiko, an maluyang infrastructure programs asin an pagtios ngonian sa inumon na tubig. Si Ben Villafuerte sarong harayong parientes ni LRV asin sarong balikbayan hale sa New York, USA. Antes siyang nag istar sa America kan 1993, inot siyang nabisto sa pagiging matibay na Basketball player kan Ateneo de Naga College. Saro siyang alumni kan CSNHS Batch 66. An saiyang ina, iyo an dating bistadong para tienda nin sira sa Supermarket asin an saiyang Ama, naging opisyal kan Bureau of Forestry sa Camarines Sur. Sa pagtapos niya nin college inot niyang trabaho iyo an sarong operator kan Commuter Train duman sa Manila, antes pa na nagbutwa an LRT asin MRT. Nagtrabaho siya builang sarong Engineer kan NIA duman sa Libmanan. Sa paghanap kan inaapod na Greener Pasteur, naglarga siya pasiring sa New York asin nagtiaga sa mga ordinaryong trabaho arog kan janitorial asin messengerial sagkod nas siya nakapag adal asin nagka iguang marhay na hanap buhay sa Amerika. Sa saiyang pag retiro, nagdesisyon siyang magbalik sa pagiging Pilipino asin digdi na siya nagretiro asin nag tetener sa Bagumbayan Sur sa Naga City. Napukaw an saiyang interes sa pulitika ninhuli sa dai na niya matios an mga salang sistema nin dalagan nin buhay sa Naga na harayo sa ibang nasyon. Kadakol an mga nagtitios sa Naga asin lalo sanang nagtitios ta pig papa -asa sa 4ps asin mga duhol na tabang kan gobyerno. An dapat gibohon mag gibo nin mga proyekto o programa na matao nin kadakol na empleo. An mga opisyales kan City Hall, garong turog sa pancitan ta mayo nin programa kun papano mareresolberan an goromok na trafiko sa Naga City. An mawot na mangyari ni Ben Villafuerte iyo na siya an madalagan sa pagka Alkalde kan Naga asin sa saiyang pagkampanya , sasaro-saroon niya an mga palpak na padalagan kan gobyerno tanganing pukawan an mga taga Naga pasiring sa tunay na pagbabago. Mawot ni Ben Villafuerte na, maiha’was sa pagtios an mga pobreng tawo, magka igua nin gulping trabaho, magka igua nin mga buildings na gigibohon pay parking asin halion an korapsyon sa gobyerno. An saro inspirasyon ni Ben Villafuerte iyo an nahiling niya na pagbuhay sa Amerika, na kadikiton an nagtitios, mayoria iguang marhay na pagbuhay asin mayong problema sa trafiko.