Volunteers nagsairarom nin training sa BLS, standard first aid, ley sa trapico

PIGTUKDUAN nin Basic Life Support, standard first aid asin pagpaotob nin traffic laws an mga volunteers na mabilog kan Bicycle Response Unit (BRU) kan syudad nin Naga. Kaibahan sa mga itinukdo an basic o simpleng pag repair kan saindang mga bisekleta.

Sinabi ni Boboy Hernandez, an program coordinator kan Naga City Bicycle Board na labi ka-importante an nasambit nang mga adal huli ta bisekleta an saro sa madali asin simpleng means of transport na daeng gayo apektado kan trapiko.

Segun saiya, malalaoman an bisekleta dawa sa panahon na igwa nin kalamidad sa pagresponde asin pagtao nin asistensya siring kan first aid orog na kun igwa nin aberiya an rescue/emergency vehicles, o igwa nin tumbang poon nin kahoy sa tinampo asin dae makaagi an mga lunadan.

Segun ki Wendy Gomez, sarong nurse sa City Health Office, an proyektong ini saro sana sa components kan active transport playbook program kan Department of Health na pigtawan nin P1 milyon na pundo kan nasambit nang ahensya nin gobyerno.

An mga volunteers kan BRU iyo an makakatuwang kan mga EMTs sa pagresponde sa panahon nin emerhensya kaibahan na an pagpaotob kan mga ley sa trapiko na pigpapangenutan kan Naga City Police Office, Land Transportation Office, asin Public Safety Office.

Sa maabot na Nobyembre 15, ngonian na taon, an pormal na paglansar kan programa. Laen kan certificates hali sa City Disaster Risk Reduction Management Office (CDRRMO) asin Department of Health, tatawan an mga volunteers nin first aid kits, 2-way radios, uniforms, asin bike helmets. An lokal na gobyerno kan syudad an matao nin libreng bisekleta sainda.