Voter’s registration iluluwas sa mga opisina kan Comelec

Pagluwas kan mga Comelec registration sa saindang mga opisina lokal tanganing mapalangkaw an numero kan nagpapalista para makaparticipar sa eleksyon sa tahaw kan hababaon si resulta sa enot na aldaw na ginibo kan Febrero 12.

Nagdumog sana si mga registrant sa nagkaperang ciudad alagad sa ibang mga banwaan hababaon si numero kan nagpapalista.

An Comelec Bicol sa pamamayo ni Director Maria Juana Valeza nagpahayag na afuera kan bagong estratihiya sa ‘‘Register Anywhere’’ program ipapadagos an mga satellite registration sa mall, escuelahan magin sa barangay alagad dinagdag an pagbisita sa mga opisina kan manlaen-laen na ahencia kan gobierno saka sa Philippine National Police asin Philippine Airforce nganing si dai nakaboto kan nakaaging eleksyon puedeng magpa-active.

Bako sanang aldaw nin Lunes hasta Viernes an mga bukas an opisina kan Comelec envez dinagdag an aldaw nin Sabado abot alas 5:00 nin hapon afuera sa aldaw kan semana santa, sabi pa kan director.

Pitong bulan sana an pagpalista na nagpoon kan Febrero 12 hasta Septiembre 30, 2024.

Target kan Comelec sa Bicol na maabot an 5 milyon na bago asin reactivated na mga botante.

Kabali sa mga nagpapalista si mabalyong lugar kan registration, reactive, pagribay nin status o pag-update kan saindang records.

Piglinaw kan Comelec na kabali sana sa mga lugar sa ‘‘Register anywhere’’ program iyo an Ciudad nin Legazpi, Ciudad nin Naga, Ciudad nin Masbate, Ciudad nin Sorsogon, Pili, Camarines Sur asin Daet, Camarines Norte.