Wonder Boy sa Chess makikibakbakan sa Tsina

Ni Sonny Malate

SAN JOSE, Camarines Sur --- Sarong siete años na Bicolanong aking lalaki  an kabale sa 7th Eastern Asia  Youth Chess Championship, sa irarom kan Chinese Chess Association (CCA), sa pakikipagtabangan kan Asia Chess Federation (ACF) asin World Chess Federation (FIDE), sa Agosto 3-11, 2023 sa Haina, China. May 51 naciones an maparticipar sa chess event na ini.

Si Mark Jeross Serit Albert, Grade One pupil sa Calabanga  Central Division Pilot School,  may pambihirang talento asin sa lumbod na edad, iguang naiibang abilidad sa kawat na ahedres o chess.

An  ama ni Mark Jeross na si Alex, gikan sa Calabanga asin sarong pedicab driver. An saiyang ina,  si Abigael, tubong  barangay Tominawog sa banwaan nin San Jose. An pamilya Albert nag-eerok sa Calabanga alagad may mga panahon na nag-iistar sa banwaan na San Jose.

Segun ki Alex,  nakanood si Mark Jeross pagkawat nin ahedres sa pagtukdo niya, kan an edad kaini limang taon pa sana. Lima an aki sa pamilya Albert asin gabos sinda tatao magkawat nin chess, pati na an ina na si Abigael. An pinakasanguhod sa magturogang  na si Mark Alexander na cuatro años pa sana nagkaigua kan saiyang debut game kan Junio 24, ngonian na taon,  sa open chess competition, durante kan Tabak Festival sa Tabaco City.

An chess wizard na si Mark Jerros Serit Albert sa sarong friendly game nin chess ki Alkalde Jerold B. Peña. (Photo: LGU San Jose)

Si Mark Jeross nakilaban na sa haros 20 chess event, kairiba na an District Meet, Palarong Panglalawigan asin Palarong Bicol kun saen naguno niya an ika-duwang lugar sa pangkagabsan. Kaibahan pa man iyo an open chess competition sa Bicol mismo asin ibang  localidad sa nacion arog kan Dipolog asin Bacolod City. An iba niya pang mga tugang nagbabale man sa mga chess event asin pareho niyang nanggagara.

Sa kadakol na vezes, siya nakakabale sa top ten sa resulta kan  karawat. Sa kadakol man na vezes, dinadaog niya an mga kalaban na mas maedad pa saiya sa open category. Nagseserbi bilang coach ni Mark Jeross iyo si Archie Haig kan ciudad nin Naga, an coach man ni Vince Rafael Operiano, taga Oas, Albay, na naguno an kampionato kan 2022 sa kaparehong chess event.

Pigbuyagyag ni Alex na magin sa academics pambihira an tibay ni Mark Jeross. Dawa na nawawara ini sa klase huli sa pag-ensayo asin paglaban sa mga chess event, ini pa an nangengenotan sa mga examination.

Si Mark Jerros nagin miembro kan National Chess Federation of the Phillipines sa initiativa ni Haig. Sa pagigin miembro, nagkaigua siyang oportunidad na makabale sa 35 na mga oragon na chess player sa sarong simultaneous game laban ki Grandmaster Jayson Gonzales, CEO, kan chess federation. 

Mayo dawa saro sa 35ng matitibay na chess player an nanggana ki Gonzales.

Alagad si Mark Jeross an pinalad na pinili kan grandmaster na makabale sa Philippine Team sa irarom kan Below 8 Division sa chess event sa Tsina.

Sa ngonian, magkahalong kaogmahan asin handal an namamate kan mag-agom na Alex asin Abigael. Mientras na nagpoon na sa pag-ensayo si Mark Jeross para sa paaboton na chess event, sibot na man an magurang sa pagtipon kan gagastoson sa pagparticipar sa chess event sa ibang nacion. 

Segun ki Alex, an total na gastos na labing Cien Mil (P100,000.00) kan aki ninda irereimbursar  man kan Philippine Sports Commission (PSC) pakatapos kan pakawat sa Tsina. Nin huli ta tikapong pamilya, an mag-agom nasisibot sa paghagad nin ayuda sa gobyerno asin privadong sector tanganing makatimos kan kaipohan na cantidad.

Mientrasranto, sa lado ni Alkalde Jerold B. Peña kan banwaan nin San Jose, siya nag-extender nin asistencia financial hale sa sadiring bulsa. An mag-agom na Alex asin Abigael naglalaom na makakakua pa man sinda nin dagdag asistencia gikan sa local na gobyerno kan Calabanga, gobyerno provincial asin iba pa.

Sa pakikipag-ulay ki Alkalde Peña kan mag-agom sa oficina kaini, kaibahan an saindang talentadong aki, pig-abisohan sinda kaini  na suportahan na gayo si Mark Jeross na macoconsiderar na sarong “genius”.

An mag-agom na Alex asin Abigael nag-apelar sa  mga may mahuyong boot na individual para sa ayuda financial. Pwede ining ipaagi sa GCash Number 09062702196. An ano man na cantidad labis nindang papasalamatan, segun sa mag-agom.

Sa sarong intrevista kan Bicol Mail,  sa kahapotan kun pignenerbiyos siya kun may mga laban,  an diretsahan na simbag ni Mark Jeross: Dae po. Sa hapot na kun masungkit niya sa Tsina an kampionato,  kiisay niya idudulot an saiyang kapangganahan, an simbag niya sa inosenteng boses: Ki Papa saka ki Mama po.